～＊～～～～＊＊～～～～～＊＊＊～～～～～＊＊～～～～＊～
2008 聖誕．香港 + 東京之旅 ~ Day 3
2008-12-14
Sunday
～＊～～～～＊＊～～～～～＊＊＊～～～～～＊＊～～～～＊～
原定行程
香港 → 羽田空港 → 新宿 → 吉祥寺 → 三鷹の森ジブリ美術館 → 新宿 → DisneySea → 新宿
實際行程
香港 → 羽田空港 → 新宿 → 吉祥寺 → 三鷹の森ジブリ美術館 → 新宿
住宿
Hotel Century Southern Tower
～＊～～～～＊＊～～～～～＊＊＊～～～～～＊＊～～～～＊～
上到機之後，Big Toe 同埋 Moxy 又話要影相。
幫佢哋影咗幾張之後，傻咩就又再瞓過。
之前上網 check-in 特登揀坐後啲。
再加上班機唔滿，我哋隔離冇人坐，所以傻咩就可以霸埋隔離張凳嚟瞓。
瞓瞓吓傻佬就叫傻咩起身，原來有嘢食喇，不過只係粥水。
食完嘢冇耐飛機就開始準備降落東京羽田空港。
傻咩嘅心情開始變得好興奮。
唯一唔係太好嘅就係啲天氣，因為已經見到落緊雨。
飛機安全降落之後，攪咗好耐先有得落機，仲要自己落樓梯行到地面再轉車番去國際航廈。
坐得後 (第54行) 所以要坐最後一架車。
再加上ANA班機早到啲，所以過關再加埋攞行李都攪咗大半個鐘。
出到嚟就去搭無料巴士到第二航廈。
到咗第二航廈，我哋一見到 vending machine 已經急不及待要買嘢飲。
可能傻咩太忙於睇嘢，又唔記咗影相喇！
然後我哋就跟住啲指示去搭東京モノレ一ル。
首先就去買飛，買完飛，今次傻咩終於記得要影相喇。
我哋買咗モノレール + 山手線内割引きっぷ，只需500円。
買完飛之後我哋就落去羽田空港第2ビル駅搵車搭。
羽田空港第2ビル駅係東京モノレ一ル嘅尾站，所以個站好空。
其實之前搭無料巴士嘅時候，大部份人都係喺第一航廈落車。
而傻咩揀去第二航廈係因為小啲人，咁就可以容易啲影多幾張相。
不過落度去月台仲有幾分鐘就開車，所以都只係影咗兩張。
我哋咁早搭就只係得普通列車搭。
唔知係咪啲人搭晒之前嗰班車，就算去到羽田空港第1ビル駅，都冇人上車。
好似我哋包咗架車咁。
我哋就繼續向モノレール浜松町駅出發。
睇清楚先至知原來東京モノレ一ル沿線只係得十個站。
車開咗發覺冇乜人，Big Toe 同埋 Moxy 又話要出嚟留影。
話咁快就去到モノレール浜松町駅，亦係我哋嘅轉車站。
離開咗東京モノレ一ル之後，我哋轉搭JR山手線向新宿駅出發。
當我哋到達新宿駅嘅時候都只不過係08:30左右。
跟住啲指示， 由南口出。
過埋馬路，好快就搵到我哋未來幾日嘅＂屋企＂ - Hotel Century Southern Tower。
因為太早，未有得 check-in，所以我哋先放低行李。
跟住就番到新宿駅到買 Suica 卡。
然後就搭JR中央本線去吉祥寺駅。
離開吉祥寺駅發覺太大雨，所以傻佬就決定買把摭。
正當傻佬俾緊錢嘅同時， 有一個好好人嘅伯伯塞咗把摭俾傻咩。
千祈唔好誤會傻咩嘅意思。
雖然傻咩係哩度用上咗個＂塞＂字，但係一啲都冇 negative 嘅意思。
Anyway，雖然傻咩一啲都唔明白伯伯講乜，但係都有同佢講番聲多謝。
跟住傻佬同傻咩就一人一把摭去搵我地嘅早餐喇。
本來係諗住去さとう吉祥寺店食松板牛肉球。
點知原來未有得買，最後我哋去咗食麥當當。
都ok好食架，不過就貴咗啲啲啦。
真係估唔到嚟到東京嘅第一餐居然會係麥當當。
食完早餐就沿住吉祥寺通り行去三鷹の森ジブリ美術館。
一路行，雨都冇停過，我哋兩個嘅褲腳都濕晒。
所以經過井の頭恩賜公園都冇影過相。
行咗大概十五至二十分鐘，我哋終於見到門口嘅トトロのニセ受付（龍貓售票亭）。
我哋去到嘅時候已經過咗 10:00，因為大部份人已經入晒去，所以唔使排隊，可以即刻去到接待處換番張宮崎駿菲林片紀念入場卷。
傻咩最鍾意嘅就係地面展示室入面以龍貓做主題嘅立體展品。
軸心帶動多個唔同形態嘅貓巴士、草子、次子，再加上燈光，做成好似動畫入面向前跑步嘅效果，令到傻咩覺得佢哋好似真嘅一樣。
出番嚟中央大廳，本來諗住睇卡通短片，點知我哋啱啱 miss 咗，於是就沿螺旋樓梯上去。
上到去原來係二樓同三樓之間。我哋就決定先上三樓。
一上到去就見到巨型貓巴士，真係希望自己仲係小朋友，可以入去玩埋一份。
跟住見冇乜人，就即刻沿室外嘅螺旋樓梯上去屋上庭園，上到去一個人都冇，傻佬同傻咩就輪流同ロボット兵（天空之城裡面嘅機械人士兵）影相。
因為落雨，所以冇係外面逗留太耐，跟住落番二樓就去圖書閱覽室。
行咗個圈，發覺啲書都幾貴，不過傻佬就話走之前一定要買番本。
然後我哋就嚟到宮崎駿動畫工作室，簡單而又精細咁介紹動畫製作。
由構思、資料搜集，到繪圖、美術工作，到故事創作，到最後將畫紙變成動畫。
可惜唔可以影相。
不過因為太多人，有啲地方睇得唔係好仔細。
跟住我哋就上番去三樓。
終於嚟到傻咩好其待嘅 souvenir shopマンマユート（曼馬由特）。
宣傳緊崖の上のポニョ，所以勁多波兒賣。
傻佬同傻咩就分頭去睇吓有啲咩買。
傻咩睇仲咗好多嘢，不過就唔係好敢買。
為咗俾多啲時間傻咩考慮，我哋就落番去地下嘅映像展示室「土星座」度睇番套卡通短片先。
戲院入面好靚，套短片都幾好睇，不過我哋相信如果聽得明講乜會仲好睇。
我哋睇完又走番上去圖書閱覽室，傻佬要買番本書。
我初初仲以為傻佬會買博物館場刊添。
最後傻佬揀咗本關天空の城ラピュタ（天空之城）嘅書。
跟住就過番去 souvenir shop 度買嘢。
傻咩最後都係冇買嘢畀自己，淨係買咗啲手信畀朋友。
傻佬見傻咩唔捨得買嘢畀自己，於是就買咗個小小 magnet 送畀傻咩喇。
多謝晒傻佬。
而傻佬亦買咗啲禮物畀人。
買完晒嘢就係時候走喇。
見仲落緊雨，所以我哋就搭コミュニティバス（community bus）番去三鷹駅。
然後轉JR中央本線番去新宿度食晏。
番到新宿就過咗去歌舞伎町，諗住去金太郎度食魚生丼，點知原來冇開門。
傻咩有小小失望。
最後我哋去咗かに道楽新宿駅前店。
入門口之前唔記得咗影門口隻巨型蟹蟹，唔緊要，食完出嚟再影過。
入到去發覺入面都幾大。
我哋叫咗個ズワイガニ（津和井蟹，又名松葉蟹）為主嘅 course 再加一個ズワイガニ天婦羅。
初初以為份量小小，點知原來都有好多嘢食架。
普通嘅蟹腳加特別嘅蟹醋。
傻咩唔食酸嘢，所以冇試過啲醋。
跟住就嚟咗個蟹刺身。
好甜，好好味。
不過就真係第一次食連殼嘅蟹刺身。
炭燒蟹同埋蟹 shabu shabu 都好好食。
正當我哋以為食完嘅時候，着住和服嘅侍應再將飯加入湯度做成湯飯。
啲湯飯真係好好味，但係我哋已經食得好飽，所以食唔晒啲湯飯。
真係好浪費。
食完出嚟又唔記得影番嗰門口喇。
食完飯都成 14:30，所以就行番過去酒店度 check-in 先。
真係估唔到我哋間房都幾正。
間房喺32樓，向東北，一張超好瞓嘅牀加埋啲軟硬適中嘅枕頭。
喺窗口嘅右面可以見到新宿駅南口，而喺左面仲可以遠遠見到富士山，不過今日太多雲，所以我哋今日見唔到。
雖然張牀係 king-size，但係間房仲好闊落
有個行李架，有書枱、凳、几仔。
因為之前嗰晚搭零晨機同埋之前落雨濕晒，所以我哋都嗱嗱聲沖番嗰涼先。
本來諗住去 DisneySea，但係太攰同埋都晏，已經成 16:30，所以就放棄咗喇。
後嚟我哋就去咗新宿東口嗰邊行街街。
唔係好記得 exactly 行咗去邊喇，淨係記得去過0101，因為傻咩睇仲咗件褸，不過冇買到，太貴啦，唔想嚟到第一日就駛咁多錢。
結果我哋兩個都冇買嘢。
後嚟去咗新宿中村屋本店到食飯。
傻咩覺得超級唔好食，可能叫得唔咁胃口。
跟住就去咗百果園度買咗盒波蘿。
沿途行番去酒店都見到幾多聖誕裝飾。
番到酒店都只不過係 21:00。
實在太攰，所以未夠 22:00 我哋就已經瞓晒覺。
～＊～～～～＊＊～～～～～＊＊＊～～～～～＊＊～～～～＊～
上一篇：2008 聖誕．香港 + 東京之旅 ~ Day 2
下一篇：2008 聖誕．香港 + 東京之旅 ~ Day 4 (原宿 + 渋谷)
2008 聖誕．香港 + 東京之旅 ~ Day 3
2008-12-14
Sunday
～＊～～～～＊＊～～～～～＊＊＊～～～～～＊＊～～～～＊～
原定行程
香港 → 羽田空港 → 新宿 → 吉祥寺 → 三鷹の森ジブリ美術館 → 新宿 → DisneySea → 新宿
實際行程
香港 → 羽田空港 → 新宿 → 吉祥寺 → 三鷹の森ジブリ美術館 → 新宿
住宿
Hotel Century Southern Tower
～＊～～～～＊＊～～～～～＊＊＊～～～～～＊＊～～～～＊～
上到機之後，Big Toe 同埋 Moxy 又話要影相。
幫佢哋影咗幾張之後，傻咩就又再瞓過。
之前上網 check-in 特登揀坐後啲。
再加上班機唔滿，我哋隔離冇人坐，所以傻咩就可以霸埋隔離張凳嚟瞓。
瞓瞓吓傻佬就叫傻咩起身，原來有嘢食喇，不過只係粥水。
食完嘢冇耐飛機就開始準備降落東京羽田空港。
傻咩嘅心情開始變得好興奮。
唯一唔係太好嘅就係啲天氣，因為已經見到落緊雨。
飛機安全降落之後，攪咗好耐先有得落機，仲要自己落樓梯行到地面再轉車番去國際航廈。
坐得後 (第54行) 所以要坐最後一架車。
再加上ANA班機早到啲，所以過關再加埋攞行李都攪咗大半個鐘。
出到嚟就去搭無料巴士到第二航廈。
到咗第二航廈，我哋一見到 vending machine 已經急不及待要買嘢飲。
可能傻咩太忙於睇嘢，又唔記咗影相喇！
然後我哋就跟住啲指示去搭東京モノレ一ル。
首先就去買飛，買完飛，今次傻咩終於記得要影相喇。
我哋買咗モノレール + 山手線内割引きっぷ，只需500円。
買完飛之後我哋就落去羽田空港第2ビル駅搵車搭。
羽田空港第2ビル駅係東京モノレ一ル嘅尾站，所以個站好空。
其實之前搭無料巴士嘅時候，大部份人都係喺第一航廈落車。
而傻咩揀去第二航廈係因為小啲人，咁就可以容易啲影多幾張相。
不過落度去月台仲有幾分鐘就開車，所以都只係影咗兩張。
我哋咁早搭就只係得普通列車搭。
唔知係咪啲人搭晒之前嗰班車，就算去到羽田空港第1ビル駅，都冇人上車。
好似我哋包咗架車咁。
我哋就繼續向モノレール浜松町駅出發。
睇清楚先至知原來東京モノレ一ル沿線只係得十個站。
車開咗發覺冇乜人，Big Toe 同埋 Moxy 又話要出嚟留影。
話咁快就去到モノレール浜松町駅，亦係我哋嘅轉車站。
離開咗東京モノレ一ル之後，我哋轉搭JR山手線向新宿駅出發。
當我哋到達新宿駅嘅時候都只不過係08:30左右。
跟住啲指示， 由南口出。
過埋馬路，好快就搵到我哋未來幾日嘅＂屋企＂ - Hotel Century Southern Tower。
因為太早，未有得 check-in，所以我哋先放低行李。
跟住就番到新宿駅到買 Suica 卡。
然後就搭JR中央本線去吉祥寺駅。
離開吉祥寺駅發覺太大雨，所以傻佬就決定買把摭。
正當傻佬俾緊錢嘅同時， 有一個好好人嘅伯伯塞咗把摭俾傻咩。
千祈唔好誤會傻咩嘅意思。
雖然傻咩係哩度用上咗個＂塞＂字，但係一啲都冇 negative 嘅意思。
Anyway，雖然傻咩一啲都唔明白伯伯講乜，但係都有同佢講番聲多謝。
跟住傻佬同傻咩就一人一把摭去搵我地嘅早餐喇。
本來係諗住去さとう吉祥寺店食松板牛肉球。
點知原來未有得買，最後我哋去咗食麥當當。
都ok好食架，不過就貴咗啲啲啦。
真係估唔到嚟到東京嘅第一餐居然會係麥當當。
食完早餐就沿住吉祥寺通り行去三鷹の森ジブリ美術館。
一路行，雨都冇停過，我哋兩個嘅褲腳都濕晒。
所以經過井の頭恩賜公園都冇影過相。
行咗大概十五至二十分鐘，我哋終於見到門口嘅トトロのニセ受付（龍貓售票亭）。
我哋去到嘅時候已經過咗 10:00，因為大部份人已經入晒去，所以唔使排隊，可以即刻去到接待處換番張宮崎駿菲林片紀念入場卷。
傻咩最鍾意嘅就係地面展示室入面以龍貓做主題嘅立體展品。
軸心帶動多個唔同形態嘅貓巴士、草子、次子，再加上燈光，做成好似動畫入面向前跑步嘅效果，令到傻咩覺得佢哋好似真嘅一樣。
出番嚟中央大廳，本來諗住睇卡通短片，點知我哋啱啱 miss 咗，於是就沿螺旋樓梯上去。
上到去原來係二樓同三樓之間。我哋就決定先上三樓。
一上到去就見到巨型貓巴士，真係希望自己仲係小朋友，可以入去玩埋一份。
跟住見冇乜人，就即刻沿室外嘅螺旋樓梯上去屋上庭園，上到去一個人都冇，傻佬同傻咩就輪流同ロボット兵（天空之城裡面嘅機械人士兵）影相。
因為落雨，所以冇係外面逗留太耐，跟住落番二樓就去圖書閱覽室。
行咗個圈，發覺啲書都幾貴，不過傻佬就話走之前一定要買番本。
然後我哋就嚟到宮崎駿動畫工作室，簡單而又精細咁介紹動畫製作。
由構思、資料搜集，到繪圖、美術工作，到故事創作，到最後將畫紙變成動畫。
可惜唔可以影相。
不過因為太多人，有啲地方睇得唔係好仔細。
跟住我哋就上番去三樓。
終於嚟到傻咩好其待嘅 souvenir shopマンマユート（曼馬由特）。
宣傳緊崖の上のポニョ，所以勁多波兒賣。
傻佬同傻咩就分頭去睇吓有啲咩買。
傻咩睇仲咗好多嘢，不過就唔係好敢買。
為咗俾多啲時間傻咩考慮，我哋就落番去地下嘅映像展示室「土星座」度睇番套卡通短片先。
戲院入面好靚，套短片都幾好睇，不過我哋相信如果聽得明講乜會仲好睇。
我哋睇完又走番上去圖書閱覽室，傻佬要買番本書。
我初初仲以為傻佬會買博物館場刊添。
最後傻佬揀咗本關天空の城ラピュタ（天空之城）嘅書。
跟住就過番去 souvenir shop 度買嘢。
傻咩最後都係冇買嘢畀自己，淨係買咗啲手信畀朋友。
傻佬見傻咩唔捨得買嘢畀自己，於是就買咗個小小 magnet 送畀傻咩喇。
多謝晒傻佬。
而傻佬亦買咗啲禮物畀人。
買完晒嘢就係時候走喇。
見仲落緊雨，所以我哋就搭コミュニティバス（community bus）番去三鷹駅。
然後轉JR中央本線番去新宿度食晏。
番到新宿就過咗去歌舞伎町，諗住去金太郎度食魚生丼，點知原來冇開門。
傻咩有小小失望。
最後我哋去咗かに道楽新宿駅前店。
入門口之前唔記得咗影門口隻巨型蟹蟹，唔緊要，食完出嚟再影過。
入到去發覺入面都幾大。
我哋叫咗個ズワイガニ（津和井蟹，又名松葉蟹）為主嘅 course 再加一個ズワイガニ天婦羅。
初初以為份量小小，點知原來都有好多嘢食架。
普通嘅蟹腳加特別嘅蟹醋。
傻咩唔食酸嘢，所以冇試過啲醋。
跟住就嚟咗個蟹刺身。
好甜，好好味。
不過就真係第一次食連殼嘅蟹刺身。
炭燒蟹同埋蟹 shabu shabu 都好好食。
正當我哋以為食完嘅時候，着住和服嘅侍應再將飯加入湯度做成湯飯。
啲湯飯真係好好味，但係我哋已經食得好飽，所以食唔晒啲湯飯。
真係好浪費。
食完出嚟又唔記得影番嗰門口喇。
食完飯都成 14:30，所以就行番過去酒店度 check-in 先。
真係估唔到我哋間房都幾正。
間房喺32樓，向東北，一張超好瞓嘅牀加埋啲軟硬適中嘅枕頭。
喺窗口嘅右面可以見到新宿駅南口，而喺左面仲可以遠遠見到富士山，不過今日太多雲，所以我哋今日見唔到。
雖然張牀係 king-size，但係間房仲好闊落
有個行李架，有書枱、凳、几仔。
因為之前嗰晚搭零晨機同埋之前落雨濕晒，所以我哋都嗱嗱聲沖番嗰涼先。
本來諗住去 DisneySea，但係太攰同埋都晏，已經成 16:30，所以就放棄咗喇。
後嚟我哋就去咗新宿東口嗰邊行街街。
唔係好記得 exactly 行咗去邊喇，淨係記得去過0101，因為傻咩睇仲咗件褸，不過冇買到，太貴啦，唔想嚟到第一日就駛咁多錢。
結果我哋兩個都冇買嘢。
後嚟去咗新宿中村屋本店到食飯。
傻咩覺得超級唔好食，可能叫得唔咁胃口。
跟住就去咗百果園度買咗盒波蘿。
沿途行番去酒店都見到幾多聖誕裝飾。
番到酒店都只不過係 21:00。
實在太攰，所以未夠 22:00 我哋就已經瞓晒覺。
～＊～～～～＊＊～～～～～＊＊＊～～～～～＊＊～～～～＊～
上一篇：2008 聖誕．香港 + 東京之旅 ~ Day 2
下一篇：2008 聖誕．香港 + 東京之旅 ~ Day 4 (原宿 + 渋谷)
No comments:
Post a Comment